Царината нема да толерира, ќе ги казнува сопствениците на половни возила со странски таблички кои ќе се задржат повеќе од шест месеци во Македонија. 

 

Првиот цариник Каргов вели дека по истекот на рокот сопствениците нема да можат да ги царинат овие возила. Засега од околу 50 илјади бугарски возила колку што се проценува, легализирани се само околу 3700. 

 

Ванчо Каргов, директор на Царинската управа вели дека по истекот на рокот ќе им се упатуваат мандатни казни на сите кои навреме нема да ги легализираат. Потоа може да дојде и до одземање на возилата и наредба да ги вратат од земјата од каде потекнуваат. 

 

По септември, Каргов најавува дека се можни и координирани акции со МВР за откривање на оние што ќе ги изиграат царинските закони. 

 

- Можни се и акции со МВР, но и да не ги контролираме, кога ќе им истече регистрацијата тие сами ќе дојдат на граница, вели Каргов. 

 

Откако Владата дозволи увоз на половни возила, до сега се увезени над 22 илјди половни возила. Од нив само мал дел се нови. Останатите во најголем дел се увезени од Германија и Словенија.